თ ა რ გ მ ა ნ ი: ესე იგი არს, ვითარმედ მიუთხართ საკჳრველი ესე ასულსა სიონისასა, რომელ არს იერუსალჱმი ქალაქი და ერი იგი იერუსალჱმელ-თაჲ; მიუთხართ ესე დიდებული, ვითარმედ აჰა ესერა მოვალს მეუფე შენი, არა ეტლებითა, ვითარცა სხუანი იგი მეფენი, არა ცხენებითა და მჴედრებითა, არა ხარკთა და საფასეთა კრებითა, არამედ ფრიადითა სიმშჳდითა და სიმდაბლითა, მჯდომარე კიცუსა ახალსა. ჵ საკჳრველი ესე დიდებული, ჵ საქმე შესაძრწუნებელი! მჯდომარე იგი ქერობინთა ზედა იხილვების კიცუსა ზედა კარაულისასა მჯდომარე. ამისთჳს განკჳრვებით იტყჳს წინაჲსწარმეტყუელი: არქუთო ასულსა სიონისასა დიდი ესე საიდუმლოჲ, რაჲთა იხილოს ჭეშმარიტი იგი მეუფე თჳსი.
ჰკითხე, საყუარელო, ჰურიასა და არქუ: ვინ არს იგი მეუფე, რომლისათჳს წინაჲსწარმეტყუელი ამას ღაღადებს, რომელი მეუფე შევიდა იერუსალჱმს კარაულსა ზედა მჯდომარე? ვერვის იტყჳან, ვერცა გამოაჩინებენ, გარნა მეუფესა ჩუენსა ქრისტესა, რომლისათჳსცა იყო სიტყუაჲ იგი წინაჲსწარმეტყუელისაჲ და აწ ესერა აღესრულა.
ესრეთ აღასრულა უფალმან სიტყუაჲ იგი წინაჲსწარმეტყუელისაჲ დაჯდომითა კიცუსა მას ზედა და ყო დაწყებაჲ სხჳსა წინაჲსწარმეტყუელებისაჲ, საქმით...