თარგმანი: ნავი ალექსანდრიელი იყო, მელიტონს დაზამთრებული და ჰრომს მიმავალი. ამისთჳს იტყჳს, ვითარ-იგი უსაკუთრეს არს: და შემდგომად სამისა თჳსა შევედით ნავსა, ჭალაკსა მას შინა დაზამთრებულსა, ალექსანდრიელსა, აღნიშნულსა დიოსკუროეთად, რამეთუ მათ ჟამთა ჯერეთ კერპთ-მსახურ იყვნეს და ესე ჩუეულებაჲ აქუნდა უფროჲსღა ალექსანდრიელთა, რომელ კერპთა სახელებსა დროშმ ჰყოფდიან ყოველთა საჴმართა მათთა. ამისთჳს აწ ნავი ესე ორთავე ფრთათა აღნიშნული იყო დიოჲს კერპისა სახელსა ზედა, რომლისათჳსცა დიოსკუროეთად სახელ-ედების, ესე იგი არს დიოჲს მწყობრისად. მის მიერ მიიწინეს სჳრაკოსად, რაჲთა სიკილიასცა მისწუთეს ქადაგებაჲ პავლესი, რამეთუ არა ვითარ თჳთ უნდა, ეგრეთ ვიდოდეს, არამედ, ვითარ სულსა წმიდასა ენება, ეგრეთ იყვანებდა პავლეს სიმრავლესა შინა ადგილთასა, სადა ჯერ-იყო ქადაგებაჲ. და ესრეთ სჳრაკოსით ქალაქით, ჭალაკით სიკილიით, მი-გარე-მოვლეს რიგონდ მიმართ.
საქმე წმიდათა მოციქულთაჲ 28:12
11. და შემდგომად სამისა თჳსა შევედით ნავსა, რომელსა დაეზამთრა მას ჭალაკსა ალექსანდრიაჲსასა, სახელით დიოსკორესსა.12. და შთავედით სჳრაკოსად და დავადგერით მუნ სამ დღე,13. ვინაჲ-იგი მოვლეთ და მოვიწიენით რეგონდ. და შემდგომად ერთისა დღისა იყო სამხრით ნიავი, და ორ დღე მოვედით პონტიოლს,
საქმე წმიდათა მოციქულთაჲ თავი 28