...ძალით ახდენს ორივეს: ერთში შვილოსნობის უნარს აღძრავს, ხოლო რაქელის საშოს აკავებს. იგი ბუნების მპყრობელია და ამიტომ ყველაფერს დაუბრკოლებლად აღასრულებს. „მიუდგა ლია და უშვა იაკობს ძე. და უწოდა სახელი მისი რუბენ და თქუა: რამეთუ იხილა უფალმან სიმდაბლე ჩემი და მომცა მე შვილი და აწ შემიყუაროს მე ქმარმან ჩემმან" (). შეხედე, რა მადლიერია ეს ქალი! უფალმა, ამბობს, ჩემი სიმდაბლე რომ იხილა, შვილი მომანიჭა, რომ მისი წყალობით ქმარს შემიყვარებინა. შენიშნე, რა სიუხვით აჯილდოებს კაცთმოყვარე ღმერთი, სურს რა მართლის შთამომავლობაც გაამრავლოს და ლიაც უფრო საყვარელი გახადოს იაკობისთვის. „და მერმე მიუდგა ლია და უშვა ძე მეორე იაკობს და თქუა: რამეთუ ისმინა უფალმან ვედრებისა ჩემისა და იხილა, ვითარმედ ვსძულ მე, და მომცა მე შვილი მეორე. და უწოდა სახელი მისი სჳმეონ" (). შეხედე, ყოველი შვილისთვის როგორ მადლობს უფალს და როგორ მადლიერია ქველმოქმედებისთვის: ისმინა უფალმა, ამბობს, რომ ვსძულვარ, და კიდევ შვილი მომცა! ამიტომაც „უწოდა სახელი მისი სჳმეონ".
4. რაქელის შური და მხევალთაგან შობილი ძენი (29:34–30:13)
ხედავ, რომ ლია სახელებსაც კი არა უბრალოდ და შემთხვევით არქმევდა შობილებს: ძეს „სჳმეონი" უწოდა,...