უწყებაჲ მიზეზსა იოვანეს მესამისა კათოლიკისასა
ხოლო მესამესა ებისტოლესა თჳსსა მიუწერს გაიოსს. და პირველად აქებს ყოველთა მიერ წამებულად უცხოთმოყუარებასა მისსა და უბრძანებს, რაჲთა მასვე გულსმოდგინებასა ზედა ეგოს, და რაჲთა შეიწყნარებდეს და წარჰგზავნიდეს ძმათა. და კუალად მისსა მას შესაწირავსა შეიწირავს. ხოლო ბრალეულ ჰყოფს დიოტროფოსს, ვითარმედ: არცა იგი მისცემს გლახაკთა და სხუათა აყენებს. და მრავალსა სიცბილსა ზრახავს და იტყჳს ესევითართათჳს, ვითარმედ უცხო არიან ჭეშმარიტებისაგან და არა იციან ღმერთი. ხოლო დიმიტრის ეწამების და წამებს მისთჳს დიდსა სიკეთესა.