1 კორინთელთა მიმართ 16:22

თარგმანი: ერთითა ამით სიტყჳთა ზოგად ყოველთა შეაშინებს, რომელნი კაცთაგან სახელ-იდებიან და რომელნი ისიძვენ, რომელნი ძმათა დააბრკოლებენ ჭამითა ნაზორევისაჲთა. და რომელნი ურწმუნო არიან აღდგომასა გუამთასა, და სხუანი, რომელნი რაჲთაცა სახითა ცოდვენ; რამეთუ საზღვარ სიყუარულისა ღმრთისა არს მოქცევაჲ ბოროტისაგან და ქმნაჲ კეთილისაჲ და დამარხვაჲ მცნებათა მისთაჲ.

თარგმანი: ესე სიტყუაჲ ასურულითა ენითა არს და გამოითარგმანების, ვითარმედ: "უფალი მოვიდა". რამეთუ თქუა რაჲ მოციქულმან, ვითარმედ — "რომელსა არა უყუარს უფალი იესუ ქრისტე, იყავნ შეჩუენებულ" (16,22), — ესევითარითა მჴურვალითა გულითა თქუა და სიყუარულითა უფლისაჲთა, რომელ მეყსეულად მიხედნა და იხილა უფალი, და მერმე ესეცა შესძინა, ვითარმედ: "აჰა, უფალი მოვიდა".