...მას: რათა პოვოს მადლი მონამან შენმან წინაშე შენსა"** (დაბ 33:6–8).
ყურადღება მიაქციე, როგორ თავმდაბლობის ძალით დაიმორჩილა ძმა და ისეთი სიმშვიდე ნახა მასში, ვისშიც მტრულ განწყობას ეჭვობდა, რომ ისიც თავის მხრივ ყოველგვარ მსახურებას მზადყოფნით სთავაზობდა. ესავმა თქვა: „არს ჩემი ფრიად, ძმაო; გეყავნ შენ შენივე" (). თუმცა იაკობი ამით არ დაკმაყოფილდა: სურდა ეჩვენებინა, რამდენად ფასობს მისთვის ძმის კეთილგანწყობა, და ამბობს: „უკუეთუ ვპოვე მადლი წინაშე შენსა, მიიღე ძღუენი ჴელთაგან ჩემთა ამისთჳს, რამეთუ ვიხილე პირი შენი, ვითარცა ვინ იხილის პირი ღმრთისა, ჯერ-მიჩინე" (). მიიღე, ამბობს, ჩემგან მოტანილი ძღვენი, რადგან ისეთი სიხარულით ვიხილე შენი სახე, თითქოს ღვთის სახე ვიხილე. ეს მართალმა განსაკუთრებული პატივისცემით თქვა, რათა გული დაელბო და ძმური სიყვარულისკენ მოეზიდა. „ჯერ-მიჩინე", ესე იგი, სასურველი გამიკეთე. „და მიიღე კურთხეული ესე, რომელ მოგართუ შენ, რამეთუ შემიწყალა მე ღმერთმან და არს ჩემი ფრიად" (). ნუ უარს იტყვი მიღებაზე, ამბობს; ეს ყოველივე ღმერთმა მიბოძა; ის არის მომცემი ყველაფრისა, რაც მაქვს. ამით იაკობი შეუმჩნევლად აგრძნობინებდა ძ...