...მთავარი თავის უფლებებს, მოქმედების თავისუფლებას აძლევს და საპყრობილეში ყველა პატიმარს მის ხელმწიფებას უმორჩილებს. „არარაჲ იცოდა მესაპყრობილეთმთავარმან მან არცა ერთი რაჲ, რამეთუ ყოველივე იყო ჴელთა შინა იოსებისთა, ამისთჳს რამეთუ უფალი იყო მის თანა. და რაოდენსა-იგი იქმოდა, უფალი წარუმართებდა ჴელთა შინა მისთა" (). შენიშნე, როგორ ახლდა მას ყოველთვის ღვთის მადლი და როგორ იყო მადლით აღსავსე ყოველივე, რასაც აკეთებდა.
ჩვენც ვიზრუნოთ, რომ ყოველთვის უფალი გვყავდეს თანამყოფი და, რომ ყოველთვის ჩვენს საქმეებს წარმართებოდა. ვინც ამ შეწევნას ეღირსა, ის უბედურებათა შორისაც დასცინებს მათ და არად მიიჩნევს, რადგან უფალი ყოველივეს მისთვის აკეთებს და განაგებს, ყოველივეში შეეწევა და მძიმეს მსუბუქს ხდის. მაშ, როგორ შეგვიძლია, ყოველთვის უფალი გვყავდეს თანამყოფი და მისგან ყოველივეში წარმართება მივიღოთ? თუ ყოველთვის ვიქნებით ფხიზლად და მღვიძარენი, — თუ ამ ჭაბუკის უმანკოებასა და სხვა სათნოებებს მივბაძავთ, მისი სულის სიმტკიცეს, — თუ ვიხსენიებთ, რომ ყოველივე ისეთი გულისხმიერებით უნდა ვაკეთოთ, რომ უფლის მიერ განკითხვას ნურასოდეს დავექვემდებაროთ, — რომ არავის შეუძლია მისი ყოვლისმხედველი თვალისგან დაფარვა და, რომ ცოდვილი აუცილებლად უნდა დაისაჯოს. ადამიანურ შიშს ღ...