1 თესალონიკელთა მიმართ 1:7

„პავლე და სილოანე და ტიმოთე ეკლესიასა თესალონიკელთასა ღმრთისა მიერ მამისა და უფლისა იესუ ქრისტესა: მადლი თქუენდა და მშჳდობაჲ ღმრთისა მიერ მამისა ჩუენისა და უფლისა იესუ ქრისტესა. ვჰმადლობთ ღმერთსა მარადის თქუენ ყოველთათჳს, ჴსენებასა თქუენსა ვჰყოფთ ლოცვათა შინა ჩუენთა. მოუკლებელად მოვიჴსენებთ თქუენთა მათ საქმეთა სარწმუნოებისათა და შრომასა სიყუარულისასა და მოთმინებასა მას სასოებისასა უფლისა ჩუენისა იესუ ქრისტესა წინაშე ღმრთისა და მამისა ჩუენისა." (1 თეს 1:1–3).

1. სარწმუნოების საქმე და სიყვარულის შრომა

რატომ მოხდა, რომ, როცა ეფესელებს სწერდა და ტიმოთეც თავისთან ჰყავდა, პავლემ მაინც თავის გვერდით არ დაასახელა იგი, თუმცა მათთვის ცნობილი და საკვირველად პატივცემული იყო (რამეთუ ამბობს: „ხოლო გამოცდილებაჲ იგი მისი იცით, რამეთუ ვითარცა მამასა შვილმან, ეგრე ჰმონა ჩემ თანა სახარებასა მას" (ფილიპ 2:22), და კვლავ: „რამეთუ არავინ მაქუს სხუაჲ ერთგული, რომელმანმცა თქუენთჳს გულითად იზრუნა" (<span...

...ვში გამოკეტილი არა აქვთ, არამედ თავიანთი სახელით მრავალს არგებენ და უკეთესებად აქცევენ. სწორედ ეს მოხდა მაშინაც. ამიტომაც ამბობდა: „ვიდრეღა იქმნენითცა თქუენ სახე ყოველთა მათ მორწმუნეთა, რომელნი არიან მაკედონიას შინა და აქაჲას." (1 თეს 1:7). ამბობს: „რამეთუ თქუენ მიერ განეფინა სიტყუაჲ იგი უფლისაჲ არა ხოლო მაკედონიას შინა და აქაიას, არამედ ყოველთა ადგილთა სარწმუნოებაჲ თქუენი ღმრთისა მიმართ განჴდა" (1 თეს 1:8). ამრიგად, ამბობს, სწავლებით ყველა ახლობელი აავსეთ, ხოლო საკვირველებით - მთელი ქვეყნიერება; რადგან სიტყვები „ყოველთა ადგილთა" (1 თეს 1:8) ამას ნიშნავს. და არ უთქვამს: „თქვენი რწმენა საყოველთაოდ ითქვა", არამედ - „განეფინა" (1 თეს 1:8), რითაც აჩვენებს, რომ როგორც ბუკის ნათელი ხმა მთელ ახლომდებარე ადგილს ავსებს, ასევე თქვენი სიმხნის სახელი, თითქოს ის ბუკი რეკდეს, საკმარისია მთელი ქვეყნიერება აავსოს და ყველგან მცხ...