...ენი საცნაურ არიან წიგნისაგან მეფეთაჲსა, რამეთუ წერილ არს მას შინა, ვი-თარმედ დღეთა იოსია მეფისათა იპოა წიგნი მეორისა რჩულისაჲ, დაფლული ყურსა ერთსა და დაძუელებული, და პოვა იგი ქელკია მღდელმან და მიუთხრა საფანს, მწიგნობართმოძღუარსა მეფისასა, მითხრობად მეფისა, ვითარმედ: „მატიანი შჯულისაჲ ვპოვე სახლსა უფლისასა“. ესე იყო წიგნი მეორისა შჯულისაჲ. ხოლო უკუეთუ ოდეს-იგი არცა ზედამოსლვაჲ ბარბაროზთაჲ იყო, არცა ტყუეობაჲ, ესრეთ შეურაცხ-ეყვნეს და წარეწყმიდნეს წიგნნი წინაწარმეტყუელთანი, რაჲ სთქუათ მოწევნასა მას ტყუეობისასა? არამცა უმრავლესი წარწყმდაა? და რომელიმე ცეცხლით დასაწუველ იქმნა; და ამისთჳს დღეს არა იპოების სიტყუაჲ ესე საწინაწარმეტყუელოთა ამათ შინა. ხოლო მახარებელმან იცოდა მადლითა მით სულისა წმიდისაჲთა თქუმული იგი წინაწარმეტყუელთაჲ, და სხუათაცა მოციქულთა იცოდეს ყოველთა. ამისთჳს იგინიცა მრავალსა ადგილსა ნაზარეველად უწოდენ.
თქუან უკუე ვიეთმე: ვინაჲთგან ერთმან მან წინაწარმეტყუელმან თქუა, ვითარმედ: „ბეთლემით გამოვიდეს“, ვითარ სხუანი იტყოდეს, თუ: „ნაზარეველ ეწოდოს“? ესე არა წინააღმდგომ მის სიტყჳსა არს. ნუ იყოფინ! არა არს წინააღმდგომ სიტყუათა შინა საღმრთოთა, რამეთუ აჰა ესერა ვხედავთ, ვითარ ორივე აღესრულა: ბეთლემით გამოვიდა, რამეთუ მუნ იშვა ქალწ...