...ხევლის სახელიც და მისი წარმომავლობაც გვაუწყა. ახლა კი შენიშნე სარას გონიერი გონება, მისი არაჩვეულებრივი თავმდაბლობა, გამოუთქმელი სიმშვიდე და მორჩილება. „და თქუა სარრა აბრაამის მიმართ ქუეყანასა ქანანისასა: აჰა ეგერა, დამჴშა მე უფალმან არა შობად. შევედ უკვე მჴევლისა მიმართ ჩემისა, რათა შვილიერ ვიქმნნეთ მისგან" (). შეხედე, რა სულგრძელობაა ამ ქალში: არაფერი ისეთი არ უთქვამს, რაც მოგვიანებით რაქელმა თქვა იაკობისადმი: „მეც მე შვილი; უკუეთუ არა, მოვკუდე მე" (). არა, რას ამბობს სარა? „აჰა ეგერა, დამჴშა მე უფალმან არა შობად". ვინაიდან, ამბობს, ბუნების შემოქმედმა ბერწი შემქმნა და შვილთა შობის უნარი წამართვა, რათა შენ, ღრმა სიბერეში მისულმა, ჩემი ბერწობის გამო სრულიად უშვილოდ არ დარჩე, „შევედ მჴევლისა მიმართ ჩემისა, რათა შვილიერ ვიქმნნეთ მისგან". დიდი და არაჩვეულებრივი სიბრძნეა ამ ქალისა! რომელი ცოლი გადაწყვეტდა ოდესმე ეს გაეკეთებინა, ან ქმრისთვის ურჩია, ან თავისი საწოლი მხევალს დაეთმო?
2. აბრაამის თავშეკავება და სარას თავგანწირვა (16:3)
ხედავ, როგორ იყვნენ ისინი ყოველგვარი ვნებისგან თავისუფალნი. ერთადერთი მიზანი ჰქონდათ — უშვილოდ არ მომკვდარიყვნენ. მაგრამ, ამასთანავე, ეცადნენ ერთმან...