რომაელთა მიმართ 3:21

თარგმანი: უჩუენა მათ, ვითარმედ არარაჲ სარგებელ ეყოფვის შჯულისაგან, და მოიყვანნა სურვილად, თუ ვითარ ცხოვნდენ. და აწ უჩუენებს მათ ქრისტეს სარწმუნოებასა და ეტყჳს, ვითარმედ: უკუეთუ იტყჳთ თუ — ვინაჲთგან შჯულითა ვერ ვცხონდებით, თჳნიერ შჯულისა ვითარ ვცხონდეთ, — მე გითხრა: სიმართლითა ღმრთისაჲთა, რომელი-იგი თჳნიერ შჯულისა მოგუეცა, რამეთუ, ვინაჲთგან ღმერთი არს მომცემელ, ნუღარა იჭუეულ ხარ, ჵ კაცო.

თარგმანი: ესრეთ იტყჳს, ვითარმედ არა ახალშემოღებული რაჲმე არს, არცა უცხოჲ ქადაგებაჲ ესე ქრისტესი, არამედ პირველითგან საიდუმლოდ მყოფი, და შჯულისა მიერ და წინაჲსწარმეტყუელთა მოსწავებული, ხოლო აწ, ჟამსა თჳსსა გამოჩინებული, და არა ერთისა ვისმე ნათესავისა, არამედ ყოვლად ყოველთა ზედა მიფენილი, რომელთა ჰრწმენეს მისსა მიმართ, რამეთუ ვინაჲთგან ძლიერი სული საჴმარ არს, რაჲთა მტკიცედ ჰრწმენეს, ამისთჳს დიდად და მხოლოდ შესაწირავად კმა-იყოფს სარწმუნოებასა, და ყოველთა განამართლებს ღმერთი მამაჲ ძისა მიერ თჳსისა, უფლისა ჩუენისა იესუ ქრისტესსა.

სხუაჲ თარგმანი გენადისი: არა ლიტონად უთქუამს, ვითარმედ ყოველთა მიმართ და ყოველთა ზედა, არამედ "ყოველთა მიმართი" ჰურიათათჳს თქუა, რომელთა-იგი ქონებითა შჯულისაჲთა თავთა შინა თჳსთა ჰქონდეს მიზეზნი ცხორებისანი, და მერმეღა შესძინებს: "ყოველთა ზედა", ესე იგი არს ზოგად ჰურიათა და წარმართთა. კუალად მათგანცა და მათგანცა მორწმუნეთა იტყჳს, ვითარმედ ორთაგანვე იგინი ოდენ განმართლდებიან, რომელთა შეუორგულებელად ჰრწმენეს განმამართლებელი იგი ყოველთაჲ უფალი ჩუენი და ღმერთი იესუ ქრისტე.