უწყებაჲ მიზეზსა კორინთელთა პირველისა ებისტოლისასა
ხოლო კორინთელთა მიმართ პირველსა წიგნსა მისწერს ეფესოჲთ ასიისაჲთ, რამეთუ ეხილვნეს იგინი და ესწავა მათდა, რომელსაცა-იგი მოაჴსენებს წიგნითა ამით.
ხოლო მიზეზი ებისტოლისაჲ ამის ესე არს, რამეთუ კორინთელნი მრავალთა რათმე ცილობათაგან განიწვალებოდეს გონებითა; და იყვნეს მათ შორის ჴდომანი და განხეთქილებისა მათისათჳს უდებ-ყვეს, რომელმან-იგი მამის ცოლი შეირთო. და სხუათა ენება განშორებაჲ ცოლთა მათთაჲ მიზეზითა მოღუაწებისაჲთა. და რომელნიმე საკერპოთა შინა ჭამდეს, ვითარმცა არარაჲ ბრალი აქუნდა ჭამად ნაზორევთაგან. ხოლო სხუანი სხუათა შეურაცხ-ჰყოფდეს. ხოლო რომელნი ენათა იტყოდიან, დიდად შეერაცხნეს. და აღდგომისათჳს მკუდართაჲსა სცდებოდეს, რამეთუ იტყოდეს, ვითარმედ ჴორცნი ესე არა აღდგებიანო.
ამათ ყოველთა მიზეზთათჳს მიუწერა ერმან მოციქულსა. და ესრეთ ყოველთა მიუწერს წიგნსა ამას. და პირველად წამებს გონიერებასა მათსა და მეცნიერებასა. ხოლო აბრალებს მათ ჴდომათა მათთჳს და განხეთქილებათა, და განაზრახებს, რაჲთა სათნოებაჲ არა სიტყჳთა, არამედ საქმითა და ძალითა მოიგონ. და მერმე შეჰრისხნა, რომელმან-იგი მამის ცოლი შეირთო. და ამცნო, რაჲთა არა აქუნდეს საშჯელი ურთიერთას. და მერმე მიუწერს მათ პასუხსა, რომლისათჳს-იგი მიუწერეს. ქორწილისათჳს უკუე ასწავებს, ვითარმედ განუყოფელ არს მეუღლებაჲ, და რაჲთა ჟამ რავდენმე ხოლო მოიცლიდენ ლოცვისათჳს. ხოლო სიწმიდისათჳს და ქალწულებისა მიუწერს, ვითარმედ არა იძულებით, არამედ ნებსით იქმნებოდენო. და მერმე ნაკერპავთათჳს ეტყჳს, რაჲთა მეცნიერებით არა მიიღებდენ, და რაჲთა სიყუარულით მოქალაქობდენ. და დააყენებს საკერპოთა შინა ჭამათა და სუმათა, რაჲთა არა დაჰბრკოლდენ მცირენი. და ესრეთ მადლთათჳს სულიერთა მისწერს, რაჲთა არა განსწვალებდენ მადლთა, არცა დააკნინებდენ გინა განადიდებდენ, რომელთა-იგი აქუნდენ, რამეთუ ყოველივე ერთისა სულისაგან არს. და აღდგომისათჳს ასწავებს, ვითარმედ ჴორცნი აღდგებიან; და რამეთუ დაეთესვის ხრწნილებით, ხოლო აღდგების უხრწნელებით, მადლითა ქრისტესითა. ხოლო აღდგომასა ქრისტეს აღდგომისაგან დაამტკიცებს, და აღსასრულსა სწავლისა სიტყუათა მიუწერს და მსახურებისათჳს წმიდათაჲსა ამცნებს, და ესრეთ აღასრულებს ებისტოლესა თჳსსა.