SASOEBA.GE
განმარტებებირჩეულები
მონიშნეთ წიგნი
თავი
თარგმანი

1 კორინთელთა მიმართ 7:13

12. ხოლო სხუათა მათ ვეტყჳ მე, არა უფალი: უკუეთუ ძმასა ვისმე ესუას ცოლი ურწმუნოჲ და მას ჯერ-უჩნდეს ყოფაჲ მის თანა, ნუ დაუტეობნ ცოლსა მას.13. და დედაკაცსა თუ ესუას ქმარი ურწმუნოჲ და მას ჯერ-უჩნდეს ყოფაჲ მის თანა, ნუ დაუტევებნ ქმარსა მას.14. რამეთუ განწმიდნების ქმარი იგი ურწმუნოჲ ცოლისა მისგან მორწმუნისა და განწმინდების ცოლი იგი ურწმუნოჲ ქმრისა მისგან მორწმუნისა. უკუეთუ არა, შვილნიმცა თქუენნი არა-წმიდა იყვნეს, ხოლო აწ წმიდა არიან.
1 კორინთელთა მიმართ თავი 7
13. და დედაკაცსა თუ ესუას ქმარი ურწმუნოჲ და მას ჯერ-უჩნდეს ყოფაჲ მის თანა, ნუ დაუტევებნ ქმარსა მას.
თავი დ̂. ქორწინებისათჳს და ქურივობისა და უქორწინებლობისა, რომელსა შინა იტყჳს, რაჲთა არა განვშორებოდინ ცოლ-ქმარნი, დაღაცათუ ურწმუნონი იყვნენ, და სიწმიდისათჳს და მეორედ ქორწინებისა
1 კორინთელთა მიმართ 7:1-40
წმინდა იოანე ოქროპირი
მთ: წმინდა ეფრემ მცირე
რედ: Titus
მოციქულისაჲ: და დედაკაცსა თუ ესუას ქმარი ურწმუნოჲ და მას ჯერ-უჩნდეს ყოფაჲ მის თანა, ნუ დაუტევებნ ქმარსა მას, რამეთუ განწმდების ქმარი იგი ურწმუნოჲ ცოლისა მისგან მორწმუნისა, და განწმიდნების ცოლი იგი ურწმუნოჲ ქმრისა მისგან მორწმუნისა (7,13-14).:

თარგმანი: იგივე შჯული ამცნო ცოლსა, რაჲ-იგი ქმარსა, და მერმე ზოგად განუქარვებს იჭუსა მორწმუნესა მას კერძოსა, რაჲთა არა განჴადოს ურწმუნოჲ იგი შიშითა შეგინებისაჲთა. ამისთჳს გამოაჩინებს სიმდიდრესა სარწმუნოებისასა, რაჟამს არა თავით თჳსით წმიდად, არამედ მორწმუნისა მიერ განწმედილად უწოდს ურწმუნოსა მასცა, რომლითა ზოგად ნუგეშინის-სცემს მორწმუნესა, და თანად უჩუენებს ურწმუნოსა მას სიმდიდრესა ქრისტიანეთა სარწმუნოებისასა, ვითარ არა ხოლო თჳთ წმიდა, არამედ სხუათაცა განმწმედელ არიან მორწმუნენი, რაჲთა ესრეთ სურვილად სარწმუნოებისა მოიყვანოს იგი.

თავი დ̂ * ა
1 კორინთელთა მიმართ 7:7-23
წმ. კირილე ალექსანდრიელი
მთ: ღირსი ექვთიმე ათონელი
რედ: Titus
მოციქულისაჲ: და ჯერ-უჩნდეს მას ყოფაჲ მის თანა, ნუ დაუტევობნ მას. და დედაკაცსა თუ ესუას ქმარი ურწმუნოჲ, და მას ჯერ-უჩნდეს ყოფაჲ მის თანა, ნუ დაუტევობნ ქმარსა მას (7,12-13).:

თარგმანი: რაჲსათჳს, რომელ, უკუეთუ სიძვაჲ გამოჩნდეს მეუღლისაჲ, ბრძანებულ არს დატევებაჲ, ხოლო ურწმუნოჲსაჲ — არა? არა უძჳრეს არსა ურწმუნოებაჲ? ჰე, უძჳრეს არს, გარნა მეძვისა ბოროტი უკეთურებისაგან გონებისა არს და მეტისა სიბოროტისა, ხოლო ურწმუნოჲ მრავალგზის უმეცრებით დაადგრის საქმესა მას ზედა მცირედჟამ, და სასოებაჲ არნ მოქცევისაჲ, ვითარცა ქუემო იტყჳს, ვითარმედ: "რაჲ იცი, დედაკაცო, აცხოვნო თუ ქმარი შენი"; რამეთუ არარაჲ არს დამაყენებელ, ოდეს მასცა არა ენებოს განშორებაჲ, სასოებითა მოქცევისაჲთა მის თანა.

მოხსენიებები ვერ მოიძებნა ამ მუხლისთვის