დაბადებისა 18:9

...კეთეები შეიძინა თავისი სტუმართმოყვარეობით, მოსული სტუმარი ბოლოს გამოაცხადებს თავის თავს და ნელ-ნელა უჩვენებს მართალს თავისი ძალმოსილების სიდიადეს. რომ დაინახა, რომ აბრაამი მუხასთან იდგა და დგომით სტუმრებს განსაკუთრებულ პატივსა და მსახურების მზადყოფნას უჩვენებდა, სტუმარი ეუბნება: „სადა არს სარრაჲ, ცოლი შენი?" (დაბ 18:9). და ასეთმა კითხვამ მაშინვე გააცნობიერებინა, რომ მოსული ჩვეულებრივი ადამიანი არ იყო, რადგან მისი ცოლის სახელი იცოდა. ხოლო მან პასუხა: „ესერა კარავსა შინა" (დაბ 18:9). და რაკი მოსულს, როგორც ღმერთს, სურდა ბუნებაზე აღმატებულის აღთქმა, თავად სარას სახელის მოხსენებით აჩვენებდა, რომ მის კარავში შესული ადამიანზე მაღლა იდგა. „შემოქცეული მოვიდე შენდა ჟამსავე ამას, — თქვა, — და ესვას ძე სარრას, ცოლსა შენსა" (დაბ 18:10). აი, სტუმართმოყვარეობის ნაყოფი, აი, გულმოდგინე მოშურნეობის ჯილდო, აი, სარას ღვაწლის საზღაური! „ხოლო სარრას ესმა კარსა ზედა კარვისა მისისასა მყოფსა უკუანა მისსა". და ეს რომ მოისმინა, „განიცინნა მეტყუელმან თავისა მიმართ თჳსისა: არღა სადა იქმნა ჩემდა ვიდრე აქამომდე, ხოლო უფალი ჩემი მოხუცებულ არს" (დაბ 18:...