ჰრომაელთა მიმართ 9:13

თარგმანი: ესე იგი არს, რაჲთა წინაჲსწარმცნობელობით გამორჩევაჲ ღმრთისაჲ გამოჩნდეს; რამეთუ, ვიდრეღა არაჲ კეთილი ექმნა იაკობს, საყუარელ უწოდა, რაჲთა სცნა, ვითარმედ პირველ შობისავე იცნის გონებანი და თუ რაჲ ყოფად-ა კაცსა მას თანა, და არა თუ კაცთაებრ ხილვაჲ უჴმს საქმეთაჲ, და მერმეღა ცნობაჲ.

თარგმანი: ესრეთ იტყჳს, ვითარმედ: არა საქმეთაგან, არამედ ძალითა წინაჲსწარმცნობელობისაჲთა, ვითარიცა უწყოდა ყოფადი მათთჳს, ეგრეთვე წინააუწყა. ვის? — არამედ დედასა მათსა, და ჰრქუა: "უხუცესმან ჰმონოს უმრწემესსა". და ესე "დაბადებასა" შინა წერილ არს. ხოლო მეორე ესე მალაქიაჲს წინაჲსწარმეტყუელებისაგან არს: "იაკობი შევიყუარე, ხოლო ესავი მოვიძულე". რამეთუ კაცთა, ოდეს იქმნის, მაშინღა ცნიან, ხოლო ღმერთმან პირველ ქმნადმდე იცის, რაოდენი რაჲ იქმნებოდის. ამისთჳს, რომლისაჲ უწყოდა კეთილ ყოფაჲ, იგი შეიყუარა, ხოლო რომლისასა მეცნიერ იყო ბოროტად ჴუმევასა თჳთმფლობელისა ნებისასა, იგი მოიძულა.