...გვიჩვენა, საიდან აიყვანა ცოლი, ისევე აქაც კვლავ ამბობს: „და მოიყვანა ლამექ თავისა თჳსისა ორ ცოლ, სახელი ერთისა — ადა და სახელი მეორისა — სელა. და შვა, — ამბობს, — ადა იობელ; ესე იყო მამაჲ მკჳდრთა კარვებისათა, საცხოვართმზრდელთა. და სახელი ძმისა მისისა იობალ; ესე იყო გამომაჩინებელ საფსალმონისა და ებნისა" ().
2. ლამექის აღსარება და თვითმხილება (4:22-24)
ყურადღება მიაქციე წერილის ზედმიწევნითობას. მან გადმოგვცა როგორც ლამექის ცოლისგან შობილ ძეთა სახელები, ისე ისიც, რა საქმიანობა ჰქონდათ; კერძოდ, რომ ერთმა მეცხვარეობა აირჩია, ხოლო მეორემ სანთური და ქნარი გამოიგონა. „ხოლო სელა, — ამბობს, — შვა, მან-ცა თობალ და იყო კუერით ხუროჲ, მჭედელი რვალისა და რკინისა" (). კვლავ (წერილმა) სელასგან შობილის საქმიანობაც აჩვენა და თქვა, რომ მან მჭედლობა აირჩია. შეხედე, როგორ ნელ-ნელა მოეწყობოდა კაცთა მოდგმის კეთილდღეობა. და პირველ ყოვლისა, კაინმა ქალაქი ააშენა და თავისი ძის სახელი დაარქვა. შემდეგ, ლამექის ძეთაგან ერთმა მეცხვარეობა აირჩია, მეორემ მჭედლობა, მესამემ სანთური და ქნარი გამოიგონა. „ხოლო დაჲ თობელისი, — ამბობს, — ნოემა" (იქვე). რა სიახლე და უცნაურობაა ეს! აი, ახლა წერილი პირველად ახსენე...