📋 სარჩევი
პავლესი: იკადროს ვინ თქუენ შორის, რომელსა სარჩელი ედვას მოყუსისა მიმართ, ვითარმცა ირჩოდა იგი ცრუთა წინაშე? (6,1).
თარგმანი: ცრუდ უწესს მთავართა მათ სამეუფოთა ურწმუნოთა.
პავლესი: და არა უფროჲსღა წმიდათა წინაშე (6,1).
თარგმანი: ეკლესიასა შინაო.
პავლესი: წმიდათა სოფელი განიკითხონ (6,2).
თარგმანი: არა თუ თჳთ დასხდენ და სიტყუასა მიჰჴდიდენ, არამედ დაჰსჯიდენ მათ, რამეთუ კაცნი იყვნეს იგინიცა და ესევითარნი საქმენი ქმნეს და იგინი არა ჰბაძვიდეს, არცა ისმენდეს სწავლასა მათსა.
მოციქულისაჲ: არა ღირთ საწუნელისა მის განკითხვისა (6,2).
თარგმანი: ესე იგი არს, ვითარმედ: ვინაჲთგან თქუენ, რომელნი-ეგე სარწმუნოვებითა და ღმრთისმსახურებითა წმიდა ხართ და თქუენ მიერ განიკითხვის სოფელი, თქუენდა რად ჯერ-არს ანუ რად ღირს-იჩინებთ საწუნელთა მათ მსაჯულთა, რომელ არიან სოფლისანი მათ წინაშე?