2 კორინთელთა მიმართ 4:11

მოციქულისაჲ: რომელთანი ღმერთმან ამის სოფლისათანი დაუბრმნა გონებანი ურწმუნოთანი (4,4).

თარგმანი: არა თუ ღმერთმან დაუბრმნა, რაჲთა არა მოვიდენ სარწმუნოებად, არამედ თჳთ დაადგრეს ურწმუნოებასა. ღმერთმან დაუბრმნა, რაჲთა, ვიდრემდის იყვნეს ურწმუნოებასა შინა, ვერ ხედვიდენ საიდუმლოთა მათ ღმრთისათა.

მოციქულისაჲ: რამეთუ მარადის ჩუენ ცხოველნი ესე (4,11).

თარგმანი: ჩუენ წინამძღუარნი ესე; რამეთუ ცხოველად ამას ადგილსა თავსა თჳსსა იტყჳს და სხუათა მათ მსგავსთა მისთა მოციქულთა.

თარგმანი: ესრეთ იტყჳს, ვითარმედ: ამისთჳს მიმიშუებს ჩუენ ღმერთი შთავრდომად დღითი-დღედთა განსაცდელთა, რაჲთა მტკიცედ გამოცხადნეს, ვითარმედ აღდგა ქრისტე; რამეთუ რომელი-იგი ჩუენ, დღითი-დღე მომკუდართა, აღმადგინებს, უეჭუელ არს, ვითარმედ აღუდგინებიეს მას თავიცა თჳსი. გინა თუ ესრეთ, ვითარმედ: ამისთჳს ჩუენ აქა სოფელსა ამას უწყალოდ სიკუდიდ მივსცემთ თავთა ჩუენთა დღითი-დღე, რაჲთა მერმესა მას მან თავადმან იჴსნნეს ჴორცნი ჩუენნი სიკუდილისაგან საუკუნოდ დაშჯისა, და ღირს ყოს მოკუდავებაჲ მათი უკუდავებასა საუკუნოჲსა ცხორებისა და სუფევისა თჳსისასა.