დაბადებისა 6:12

...ცთა ამათ შორის... ყოფისათჳს მათისა ჴორც"** (დაბ 6:3), ისევე: „განიხრწნა ქუეყანა... და აღივსო ქუეყანა უსამართლოებითა" (დაბ 6:11), კიდევ: „იხილა უფალმან ღმერთმან ქუეყანა და იყო განხრწნილ, რამეთუ განხრწნა ყოველმან ჴორციელმან გზაჲ თჳსი" (დაბ 6:12). ამრიგად, რადგან ქვეყნიერებას სრული განწმენდა სჭირდებოდა და საჭირო იყო ყოველი უწმიდურებისგან განბანვა და ძველი გარყვნის მთელი საფუარის განადგურება ისე, რომ უკეთურების კვალიც არ დარჩენილიყო, არამედ თითქოს სტიქიათა განახლება მომხდარიყო, — უფალი გამოცდილი ოსტატის მსგავსად მოიქცა, რომელიც დროისგან დაძველებულ, ჟანგისგან, ასე ვთქვათ, შეჭმულ ჭურჭელს ცეცხლში ისვრის და მთელ ჟანგს მოშორებს, გარდაქმნის, გადაკეთებს და პირვანდელ მშვენიერებას უბრუნებს. ისევე ჩვენმა უფალმაც, ამ წარღვნით მთელი ქვეყნიერება განწმინდა, ადამიანთა უკეთურების სიბილწისგან, ასე ვთქვათ, განათავისუფლა, უფრო მშვენიერი გახადა და კვლავ ბრწყინვალე სახით წარმოგვიჩინა, ძველი უსახურობის კვალის დარჩენა არ დაუშვა. „ათხუთმეტ წყრთა ზედა კერძო ამაღლდა წყალი". უმიზეზოდ კი არ გვიყვება ამას წერილი, არამედ იმისთვის, რომ ვიცოდეთ: დაიხრჩვნენ არა მხოლოდ ადამიანები, საცხოვარი, ოთხფეხნ...

...ებს თელავდნენ და ბუნებაში ჩადებულ მოძღვარს (სინდისს) თავიანთი უზრუნველობით უარყოფდნენ. „და აღივსო ქუეყანაჲ სიცრუვითა", — ამბობს. ხედავ, საყვარელო, რა ბოროტებაა ცოდვა — როგორ ხდის ადამიანებს თვით ადამიანის სახელისაც უღირსებს? ისმინე, რას ამბობს შემდგომ. „და იხილა უფალმან ღმერთმან ქუეყანა და იყო განხრწნილ" (დაბ 6:12). შეხედე, ისინი კვლავ მიწად იწოდებიან. შემდეგ, როცა წერილმა ერთხელ, მეორედ და მესამედ მიწა უწოდა მათ, რათა ვინმეს არ ეფიქრა, გრძნობადი მიწის შესახებ ითქვა ესო, ამბობს: „რამეთუ განხრწნა ყოველმან ჴორციელმან გზაჲ თჳსი ქუეყანასა ზედა". ახლაც არ ღირსყო მათი ადამიანებად მოხსენიება, არამედ ხორცის სახელით მხოლოდ იმის ჩვენება სურს, რომ მიწის შესახებ კი არა, ხორცშესხმულ ადამიანებზე ამბობს ამას, რომლებმაც მიწიერ საქმეებს მიეცნენ. წერილს, როგორც ხშირად შევნიშნეთ, საყვარელნო, ჩვეულება აქვს, ხორცს უწოდოს ადამიანებს, რომლებიც ხორციელ მისწრაფებებს კვებავენ და არაფერ ამაღლებულზე არ ფიქრობენ, როგორც ნეტარი პავლეც ამბობს: „ჴორცთა შინა არიან, ღმრთისა სათნო-ყოფად ვერ ძალ-უც" (რომ 8:8). რა? ვინც ეს თქვა, თავად ხორცშესხმული არ იყო? იყო. მაგრამ ის არ ამბობს, რომ ხორცშესხმულთ ღვთის სათნოყოფა არ შეუძლიათ, არამე...