1 კორინთელთა მიმართ 3:12

თარგმანი: სამ არიან ნივთნი მართალთანი: ოქროდ სახელდებული იგი განწმედილი ღმრთისმეტყუელებაჲ, და ვეცხლად წოდებული კრძალულებითი ცხორებაჲ, და ანთრაკად გინათუ, ვითარ-იგი უსაკუთრეს არს, ქვებად პატიოსნებად წოდებულნი საღმრთონი გულისსიტყუანი.

და კუალად, სამ არიან ნივთნი ცოდვილთანი: ძელად წოდებული —ნივთთ მოყუარებაჲ, და თივად სახელდებული — ცხორებაჲ პირუტყუებრი, და ლერწამ თქუმული — გულისსიტყუანი ვნებულნი. რამეთუ შემდგომად სარწმუნოებად მოსლვისა მართალთა კრებული აშენებს სარწმუნოებასა ზედა, ნივთად მდგმოდ, საქმეთა კეთილთა, მიმსგავსებულთა ოქროჲსა და ვეცხლისა და ქვათა პატიოსანთასა; ხოლო ცოდვილნი — საქმეთა ბოროტთა, სახედ ნივთისა ადვილად აღსაგზებელისა, რომელი-იგი ღირს არნ მერმისა მის ცეცხლისა.

თარგმანი წმიდისა მაქსიმესი: საფუძველი არს ქრისტეს სარწმუნოებაჲ, ხოლო აღაშენებენ კაცნი მას ზედა, ვითარცა ოქროსა, — რომელნი-იგი ღმრთისმეტყუელებენ მაღლითა გონებითა, და საიდუმლოთა ღმრთისათა ქადაგებენ. ხოლო ვითარცა ვეცხლსა — სათნოებათა კეთილთა; და ქვათა პატიოსანთა — კეთილთა გულისსიტყუათა, და შეშასა — სიყუარულსა ხილულთა ამის სოფლისა საქმეთასა; ხოლო თივასა იგი აშენებს, რომელი პირუტყუებრ უგულისჴმო იყოს, და ლერწამსა — რომელი ხრწნილებასა იქმოდის. და მოქმედთა კეთილისათა დღე იგი საცნაურ ჰყოფს, რამეთუ ცეცხლითა, იგი არს სულითა წმიდითა, გამოჩნდენ, თუ მის მიერ ქმნილ იყვნენ, ხოლო ცოდვილთა საქმენი დაიწუნენ ცეცხლითა მით უშრეტითა.

თარგმანი: საფუძველი არს ქრიტეს სარწმუნოებაჲ, ხოლო აღაშენებენ კაცნი ამას ზედა; ვითარცა ოქროსა —რომელნი-იგი ღმრთისმეტყუელებენ მაღლითა გონებითა და საიდუმლოთა ღმრთისათა ქადაგებენ; ხოლო ვითარცა ვეცხლსა — სათნოებათა კეთილთა; და ქვათა პატიოსანთა — კეთილთა გულისსიტყუათა; და შეშასა —სიყუარულსა ხილულთა ამათ, ამის სოფლისა საქმეთასა; ხოლო თივასა — რომელი პირუტყუებრ უგულისჴმო იყოს; და ლელწამსა — რომელი ხრწნილებასა იქმოდის; და მოქმედთა კეთილისათა დღე იგი საცნაურ-ჰყოფს, რამეთუ ცეცხლითა, ესე იგი არს სულითა წმიდითა გამოჩნდენ, ვითარმედ მის მიერ ქმნულ არიან, ხოლო ცოდვილთა საქმენი დაიწვიან.