დაბადებისა 4:8

...დ ამ ვნებამ — შურმა — თავიდანვე კაინი ძმის მკვლელობამდე მიიყვანა. როგორც იოსების ძმებმა, მამის სიყვარულის გამო, სიძულვილი შეიპყრეს, ბოროტი განზრახეს და ყოველდღე მისი მოკვლისთვის მზად იყვნენ, ასევე კაინმა, ძმის ძღვენი რომ ღვთისთვის უფრო სათნო იყო მისაზე, ძმის მოკვლა გადაწყვიტა და ეუბნება: „განვიდეთ ზოგად ველად" (დაბ 4:8). ხედავ, რომ ესეც — აბელი — არანაირი ეჭვის გარეშე, ყველაფერში ძმას ენდობა და მიჰყვება, და ყოველგვარი მოლოდინის გარეშე დანაშაულებრივი ხელის მსხვერპლი ხდება. ასევე საკვირველი იოსებიც, ძმების ბოროტი განზრახვას რომ ვერ ამჩნევდა, მათთან ძმურად ექცეოდა და თავის სიზმრებს უამბობდა, რომლებშიც ღმერთი მისი მომავალ სიდიადეს და ძმების მისადმი დამორჩილებას აცხადებდა. „ჩუენებაჲ იხილა იოსებ, — ამბობს წერილი, — და უთხრა ძმათა თჳსთა. და ჰრქუა: იხილეთ ჩუენებაჲ ესე, რომელი მეჩუენა. მეგონა მე, ვითარმედ თქუენ ჰკრევდით მჭელეულსა შორის ველსა და აღდგა მჭელეული ჩემი და აღემართა. და მოიქცეს მჭელეულნი თქუენნი და თაყუანის-სცეს მჭელეულსა ჩემსა. ჰრქუეს მას ძმათა თჳსთა: აწ მეფობით ნუ მეფობდი-ა ჩუენ ზედა, ანუ უფლებით უფლებდე ჩუენ ზედა? და შესძინეს მერმე სიძულილი მისი ჩუენებათა მათ მისთათჳს და სიტყუათათჳს მისთა" (დაბ 37:5–8). რომ სიძულვილი მისადმი უფრო ადრე...

...*„ღა შენ ჰმთავრობდი მას"**, ანუ შენ თვითონ ისარგებლებ მითო. ამრიგად, ორივე (განმარტება) წარმოვადგინე და თქვენს კეთილგონიერებას მივანდობ — მიიღეთ ის, რომელიც თქვენ უფრო შესაფერისად მიგაჩნიათ. მე კი მჩვენია, რომ ეს ძმის შესახებ ითქვა. „და იყო ყოფასა მათსა ველს, აღდგა კაინ აბელის ზედა, ძმისა თჳსისა, და მოკლა იგი" (დაბ 4:8). საშინელი საქციელი, დამღუპველი თავხედობა, საძულველი საქმე, მიუტევებელი ცოდვა, მხეცური სულის ჩანაფიქრი! „აღდგა, — ამბობს, — აბელის ზედა, ძმისა თჳსისა, და მოკლა იგი". ოი, საძაგელი ხელი! ოი, საბრალო მარჯვენა! თუმცა, არა ხელი უნდა ეწოდოს საძაგელი და საბრალო, არამედ განზრახვა, რომელსაც ეს სხეულის ნაწილი ემსახურა. ამიტომ ასე ვთქვათ: ოი, თავხედი, საძაგელი და საბრალო განზრახვა! და რაც არ უნდა ვთქვათ, მის ღირსს ვერ ვიტყვით. როგორ არ გაშეშდა მისი ხელი! როგორ შეძლო მახვილის აწევა და დარტყმა! როგორ არ გამოეფრინა სული სხეულიდან! როგორ შეძლო ამ უსჯულო ჩანაფიქრის აღსრულება! როგორ არ შეირყა და არ შეიცვალა განზრახვა! როგორ არ იფიქრა ბუნებაზე! როგორ არ იფიქრა, საქმის ჩადენამდე, მის შედეგზე! როგორ შეძლო, მკვლელობის ჩადენის შემდეგ, მიწაზე მოტოკებული ძმის სხეულისთვის ეყურებინა! როგორ შეძლო მიწაზე გაშლილი გვამის ხილვა და მაშინვე უძლურებაში...