📋 სარჩევი
პავლესი: ვისწრაფოთ შესლვად განსასუენებელსა (4,11).
თარგმანი: სამთა განსასუენებელთა იტყჳს; ერთსა მას, ჴორციელსა — შაბათისასა, და მეორესა მას შესლვასა ქუეყანასა მას აღთქუმისასა, და მესამესა — ზეცისასა, რომელსა აწ გუეტყჳს, რაჲთა ვისწრაფოთ.
პავლესი: რომლისა მიმართ არს სიტყუაჲ ჩუენი (4,13).
თარგმანი: ესე იგი არს, ვითარმედ: რომლისა მიმართ თანა-გუაც სიტყჳსა მიცემაჲ საქმეთა ჩუენთათჳს.
პავლესი: რომელმან განვლნა ცანი (4,14).
თარგმანი: რამეთუ უზეშთაეს ცათა ამაღლდაო.
პავლესი: შევიკრძალოთ აღსაარებაჲ (4,14).
თარგმანი: რომელი აღსაარებაჲ? — ესე, ვითარმედ: აღდგომა ყოფად არს და მიგებაჲ საქმეთაებრ, და ბვრეულნი კეთილნი, და ვითარმედ ქრისტჱ ღმერთი არს, —ესე აღსაარებაჲ დავიმჭიროთ.
პავლესი: გამოცდილი ყოვლითავე მსგავსებითა, თჳნიერ ცოდვისა (4,15).
თარგმანი: ესე იგი არს, ვითარმედ: იდვნა, შეემშია, იგუემა, ჯუარს-ეცუა, ყოვლითურთ გუემსგავსა, თჳნიერ ცოდვისა.